ABŞ Ukraynanı sürətlə yaz əks-hücumuna hazırlayır - "Politico"dan detallar

Qaynarinfo bu barədə "Politico"ya istinadla xəbər verir.

ABŞ-ın müdafiə naziri Lloyd Austin çərşənbə günü Ukraynanın müdafiəsi üzrə çoxmillətli təmas qrupunun virtual görüşündən sonra deyib ki, "Ukraynanın boş yerə sərf ediləcək vaxtı yoxdur”.

"Biz vədlərimizi tez və tam şəkildə yerinə yetirməliyik. Bura zirehli texnikalarımızı döyüş meydanına çatdırmaq və Ukrayna əsgərlərinin bu yeni sistemlərdən mümkün qədər tez istifadə etmək üçün lazım olan təlim, ehtiyat hissələri və texniki dəstəyi almasını təmin etmək daxildir", deyə Austin bildirib.

Bahar yaxınlaşdıqca, ABŞ rəsmiləri Ukraynanın döyüş sursatları, hava hücumundan müdafiə vasitələri və təcrübəli əsgərlərinin tədarükünün getdikcə azalmasından narahatdırlar.

Pentaqon bildirir ki, Kiyevin döyüş meydanındakı strategiyasından asılı olmayaraq, ABŞ Ukrayna əsgərlərinin döyüşü davam etdirmək üçün lazım olan silahlara malik olmasını istəyir.

Rusiya aylardır ölkəni raketlərlə bombalayır, təkcə dağıntılar törətmək deyil, həm də Ukraynanın hava hücumundan müdafiəsini məhv etmək istəyir. Ukrayna əsgərləri əsas döyüş sursatlarının, xüsusən minaatanların və artilleriya mərmilərinin ciddi çatışmazlığından danışırlar. ABŞ rəsmilərinin hesablamalarına görə, müharibə ili ərzində ən təcrübəli əsgərlər də daxil olmaqla 100 mindən çox Ukrayna əsgəri həlak olub.

Materialda Baxmut uğrunda döyüşdə hər iki tərəfin böyük itki verdiyi qeyd edilir. Vaqnerçilərin rəhbərlik etdiyi Rusiya cənub-şərq şəhərini 9 aydır ki, mühasirəyə alır və onu xarabalığa çevirir.

Ukrayna qoşunları təslim olmaqdan imtina edir və prezident Vladimir Zelenski israr edir ki, Baxmutu müdafiə etmək digər şərq şəhərlərini saxlamaq üçün açardır.

Əvəzində ABŞ rəsmiləri diqqəti daha çox Ukraynanı may ayında başlayacağını gözlədikləri əraziləri geri almaq üçün böyük yaz hücumuna hazırlamağa cəmləyiblər.

Yüzlərlə Qərb tankı və zirehli texnikası, o cümlədən ilk dəfə olaraq körpü qura bilən və qoşunların çaylardan keçməsinə imkan verən maşınlar hücum üçün Ukraynaya doğru gedir.

Amerikalı və avropalı tərəfdaşlar həmçinin Ukraynanın ən təcili ehtiyacı kimi müəyyən etdiyi böyük miqdarda sursat və 155 mm-lik mərmi göndərirlər.

Administrasiyanın tələblərinə görə, adının açıqlanmasını istəyən ABŞ rəsmisi deyib ki, ABŞ-ın yardım paketləri "son dörd-beş ay ərzində Ukraynanın bu əks-hücum üçün nəyə ehtiyacı olduğuna diqqət yetirib”.

ABŞ rəsmiləri Kiyevə müharibə ilə necə mübarizə aparacağını söyləməməkdə ehtiyatlı olsalar da, Pentaqon rəsmiləri çərşənbə günü bildiriblər ki, verilən avadanlıq və təlim Ukraynaya müharibədə qalib gəlməyə imkan verəcək - harada və nə vaxt bunu etməyi Ukrayna özü seçəcək.

ABŞ-ın Birləşmiş Qərargah Rəisləri Komitəsinin sədri, general Mark Milley deyib: "Ukraynanın özünü müdafiə etməsi üçün Ukrayna ordusunu müxtəlif ölkələrdə təchizat, sursat və təlim baxımından gücləndirmək üçün əhəmiyyətli səylər göstəririk”.

"Ukraynanın potensialının gücləndirilməsi Ukrayna rəhbərliyinə öz məqsədlərinə çatmaq və bu müharibəni uğurlu nəticəyə çatdırmaq üçün gələcək fəaliyyətlərinin müxtəlif variantlarını işləyib hazırlamağa və həyata keçirməyə imkan verəcək", deyə Milli əlavə edib.

Fevral ayında 600-dən çox ukraynalı Almaniyada 5 həftəlik təlim proqramını başa vurub, bu proqrama atışma kimi əsas bacarıqlar, həmçinin tibbi təlim və Amerika istehsalı olan Bradley döyüş maşınları və Stryker zirehli personal daşıyıcılarının manevr edilməsi üzrə təlimat daxildir. İndi həmin qüvvə döyüş meydanına qayıdır və yüzlərlə əlavə əsgərdən ibarət ikinci dəstə indi proqramda hazırlanır.

Bağlı qapılar arxasında ABŞ rəsmiləri Kiyevdən artilleriya sursatlarına qənaət etməyi və daha dəqiq atəş açmağı tələb edir. Xüsusən də hər iki tərəfin sursatı sürətlə tükəndiyi Baxmutda.

"Pentaqonda bəziləri döyüş sursatının çox sürətlə israf etdiklərini hiss edir. Bağışlayın, onlar artilleriya sursatında böyük üstünlüyə malik olan və geri çəkilməyən düşmənə qarşı ölkələrinin sağ qalması uğurnda irimiqyaslı mübarizə aparırlar”, deyə istefada olan general-leytenant, ABŞ Ordusunun Avropadakı keçmiş komandanı Ben Hoces qeyd edib.

ABŞ rəsmiləri deyirlər ki, Kiyev hələ strategiya barədə qərar verməyib, lakin onun mahiyyətcə iki variantı var: Xersondan cənuba - Krıma doğru irəliləmək, ya da şimal mövqeyindən şərqə, sonra isə cənuba doğru hərəkət edərək Rusiya quru körpüsünü kəsmək.

Rəsmilərin fikrincə, birinci variant real deyil, çünki Rusiya Dnepr çayının şərq sahilində öz müdafiəsini möhkəmləndirib və Ukrayna bu cür qüvvələrə qarşı amfibiya əməliyyatını uğurla həyata keçirmək üçün kifayət qədər canlı qüvvəyə malik deyil. Rəsmilərin fikrincə, ikinci variant daha çox ehtimal olunur.