Ölkə 14:35 01.10.2022

Mədəniyyət Nazirliyi məhkəməyə verilir: Yarım milyon manatlıq “Qarınqulu” davası

Azərbaycanda animasiya filmələri sahəsində ixtisaslaşan "NME” MMC-nin rəhbəri Nicat Manafov Mədəniyyət Nazirliyini məhkəməyə verməyə hazılaşır. 

Bu barədə Qaynarinfo-ya Nicat Manafovun özü bildirib.

Onun sözlərinə görə, bir neçə gün əvvəl Bakı Kommersiya Məhkəməsində Mədəniyyət Nazirliyinə qarşı iddia qaldırsa da, icraata götürülməyib: "Belə əsaslandırdılar ki, işin Bakı Kommersiya Məhkəməsinə aidiyyəti yoxdur. Dedilər ki, ümumi məhkəməyə müraciət etməlisən. Mən də bu dəfə ümumi məhkəməyə müraciət etməyi düşünürəm. Yəqin ki, yaxın günlərdə iddiamı təqdim edəcəm”.

Nicat Manafov iddiasında Mədəniyyət Nazirliyi ilə "Salnaməfilm” studiyası arasında bağlanmış müqavilənin ləğv olunmasını tələb edir.

Məlumat üçün deyək ki, "Qarınqulu” tammetrajlı animasiya filminin çəkilişi "Salnaməfilm” studiyasına həvalə edilib. Nicat Manafov təxminən yarım milyon dəyəri olan layihənin tender keçirilmədən Mədəniyyət Nazirliyinin tabeliyində fəaliyyət göstərən və animasiya filmlərinin çəkilişində ixtisaslaşmayan "Salnaməfilm” studiyasına verilməsini qanunsuz hesab edir.

"NME” MMC-nin rəhbəri bununla bağlı ilk olaraq İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə müraciət ünvanlayıb. Müraciətə cavab olaraq qurum Mədəniyyət Nazirliyinə məktub göndərərək "Salnaməfilm” studiyası ilə müqavilənin ləğv olunmasını və "Dövlət Satınalmaları haqqında” Qanuna müvqafiq olaraq bütün podratçılara bərabər rəqabət mühitini təmin etməklə tender keçirilməsini tələb edib. 

Nicat Manafov deyir ki, Mədəniyyət Nazirliyi bu tələbə əməl etmir: "Faktiki olaraq iş gedir. Ona görə də düşündüm ki, məsələnin məhkəmə müstəvisində həllinə nail olum”.

Seyid