Mövzunu Qaynarinfo-ya  şərh edən siyasi şərhçi Kənan Rövşənoğlunun fikrincə, İraqda baş verən qarşıdurmada məqsəd Müqtəda əs-Sədri nüfuzdan salmaqdır:

"Hazırda orada vəziyyət çox mürəkkəbdir. Keçən il keçirilən seçkilərdən sonra hökumətin qurula bilməməsi siyasi böhranın daha da dərinləşməsinə səbəb olub. Sədr hərəkatı parlamentdə ən çox səs qazanan blokdur. Amma hökumət qurmaq mümkün olmur, çünki çoxlu sayda maraqlı qüvvələr var. Əs-Sədr tərəfdarları bir müddətdir ki, parlamentin buraxılması və yeni seçkilərin keçirilməsi tələbi ilə aksiya keçirirdi. Dünən isə qəfildən Müqtəda əs-Sədr siyasətdən getdiyini elan etdi, ardınca isə xaotik hadisələr baş verdi. Aksiyaçılar hökumət binaları və parlamentə hücum etdi. Yaşıl Zona münaqişə rayonuna çevrildi, ilkin məlumata görə 20 nəfər artıq ölüb. Əs-Sədr tərəfdarlarını sakitləşməyi və yaşıl Zonadan çıxmağa çağırıb. Amma hələlik onun çağırışına əməl etmirlər. Ehtimal etmək olar ki, əs-Sədr tərəfdarları adı altında provokasiya qrupları var, onlar məqsədli şəkildə ölkədə anarxiya və xaos yaratmaq istəyirlər. Bununla da həm İraqda vəziyyət daha da pisləşəcək, həm də əs- Sədr nüfuzunu itirəcək”. 

Prosesdə xarici dövlətlərin marağına gəldikdə isə həmsöhbətimiz qeyd edir ki, İraqda bir çox xarici dövlətlərin marağı var:"İran, ABŞ, Böyük Britaniya, Səudiyyə Ərəbistanı, Türkiyə kimi ölkələr İraq siyasətinə ciddi təsiri olan dövlətlərdir”.