Dünya 18:18 05.07.2023

Dörd ölkə 176 nəfərin ölümü ilə bağlı İrana qarşı iddia qaldırdı

Kanada, İsveç, Ukrayna və Böyük Britaniya 8 yanvar 2020-ci ildə PS752 reysinin Tehran tərəfindən məhv edilməsinə görə Beynəlxalq Ədalət Məhkəməsində İrana qarşı iddia qaldırıb.

Qaynarinfo xəbər verir ki, bu barədə çərşənbə günü, iyulun 5-də məhkəmə məlumat verib.

Ölkələrin bəyanatında deyilir ki, İran Ukrayna Beynəlxalq Hava Yollarına məxsus təyyarəni Tehrandan havaya qalxdıqdan sonra vuraraq Monreal Konvensiyasından irəli gələn bir sıra öhdəlikləri pozub.

"Şikayətçilərin sözlərinə görə, İran cinayətin qeyri-qanuni və qəsdən törədilməsinin, o cümlədən PS752 reysinin məhv edilməsinin qarşısını almaq üçün bütün mümkün tədbirləri görməyib. Sonra o, beynəlxalq hüquq normalarına uyğun olaraq qərəzsiz, şəffaf və ədalətli cinayət araşdırması apara bilməyib”, deyə press-relizdə bildirilir.

Ukrayna Beynəlxalq Hava Yollarına məxsus Tehran-Kiyev reysinin "Boeing 737-800" təyyarəsi 2020-ci il yanvarın 8-də səhər İran paytaxtının hava limanından havaya qalxdıqdan dərhal sonra vurulub. Təyyarədə olan 176 nəfərin hamısı həlak olub. Ölənlərin əksəriyyəti İran və Kanada vətəndaşlarıdır.

Qəzadan sonra dördüncü gündə İran tərəfi Ukrayna sərnişin təyyarəsinin düşmən hədəfi ilə səhv salaraq, hərbçiləri tərəfindən vurulduğunu rəsmən etiraf edib. Uçuş qeydlərinin deşifrələnməsi laynerin istismara yararlı olduğunu və qəzanın iki zenit raketinin atılması nəticəsində baş verdiyini təsdiqləyib.

Məlumata görə, raketin birincisi təyyarəyə xeyli ziyan vurub, lakin mühərriklər sönməyib, pilotlar uçuşa nəzarət etməyə çalışsalar da, ikincisi təyyarəni məhv edib.

İran təkid edir ki, təyyarə qəzası ölkənin hərbi rəhbərliyinin göstərişi ilə deyil, hava hücumundan müdafiə operatorunun səhvi nəticəsində baş verib. Ukrayna bu mövqe ilə razılaşmır və təzminat ödənilməsini tələb edir.

Təyyarə qəzası ilə bağlı Tehran tərəfindən 10 iranlı məmura qarşı ittiham irəli sürülüb. Onların adları və vəzifələri açıqlanmayıb.

Nizami Bağırov