Siyasət 21:48 31.05.2023

Makron Avropanı “strateji oyanış”a çağıracaq – The Guardian

Fransa prezidenti Emmanuel Makron Bratislavada keçirilən GLOBSEC Beynəlxalq təhlükəsizlik forumunda Rusiyanın Ukraynaya genişmiqyaslı müdaxiləsi fonunda Avropanı "strateji oyanış”a çağıracaq.

Qaynarinfo xəbər verir ki, bu barədə The Guardian məlumat yayıb.

Qəzetin yazdığına görə, mayın 31-də çərşənbə günü çıxışı zamanı Fransa liderinin Kiyevə döyüş tanklarının tədarükünün blokdan çıxarılmasında, eləcə də NATO-nun şərq cinahının qorunmasında Parisin rolunu qeyd edəcəyi gözlənilir. Xüsusilə, o, Rumıniyada 1250, Estoniyada isə 300 fransız hərbçisinin yerləşdirilməsini qeyd edəcək.

"The Guardian” yazır ki, ertəsi gün Moldovada keçiriləcək Avrosammitdə Makron "Fransanın Ukraynanın qələbəsinə sadiqliyini vurğulayacaq və dondurulmuş münaqişəyə dözməyəcəyini bəyan edəcək”.

O, həmçinin Rusiyanın nüvə silahlarına nəzarət müqavilələrindən ardıcıl olaraq çıxması, eləcə də Rusiyanın taktiki nüvə silahlarının Belarusda yerləşdirilməsi ilə bağlı razılaşma ilə əlaqədar Avropanın strateji sabitliyinin "dərin və davamlı tənəzzülü” barədə xəbərdarlıq edəcək.

Nəşrin Fransa hökumətindən olan həmsöhbətinin sözlərinə görə, Makron artıq 2019-2025-ci illərlə müqayisədə Fransanın 2024-2030-cu illər üçün planlaşdırılan müdafiə xərclərini üçdə birdən çox artırmağa icazə verib və bunu "kardinal dəyişikliklər” hesab edir.

Mart ayında Parisdə keçirilən Fransa-Britaniya sammitində NATO-nun "uzaqmənzilli” imkanlarının inkişaf etdirilməsi təklifi müzakirə edilib. Qəzetin mənbələrinə görə, bu, Makronun Avropa müdafiəsinin yalnız Aİ ətrafında qurulmasında israr etmədiyini göstərir.

Nizami Bağırov