Bu gələn “Şamaxı”nın ayaq səsləri...

 

Ümid edirəm ki, AFFA İntizam Komitəsi ispaniyalının bu qaba davranışını cavabsız qoymayacaq, "Sabah”ın legionerinə sərt cəza veriləcək. Eləcə də klub rəhbərliyi bu məsələyə laqeyd qalmamalıdı. Sebalyos həm komandasını azlıqda qoymaqla xal itkisinə səbəb olub. Həm də futbolçuya yaraşmayan davranışı ilə "Sabah”ın imicinə ciddi zərbə vurub. Biz indiyə qədər "Sabah”a və onun futbolçularına sayğı ilə yanaşmışıq. Masazır təmsilçisi çempionata rəng qatıb, "Neftçi”ni heç də əbəs yerə üstələməyib. Amma bu o demək deyil ki, komandanın əcnəbiləri istədiyini edə, yerli gəncləri meydanın ortasında vura bilərlər. O gənclər bizim hamımızındı. Elə Kamran Quliyevin də yetişməsində, bu səviyyəyə yüksəlməsində "Sabah”ın xidmətləri var. Deməli, bizimlə birlikdə "Sabah” da Kamrana, eləcə də digər gənclərimizə sahib çıxmalı, onları gəlmələrin ayağına verməməlidi.

Xoşagəlməz bu olay belə "Şamaxı”nın əzmkarlığını, qazandığı qızıldan qiymətli bir xalı kölgəyə sala bilməz. Biz illərdi bunu deyirik ki, azərbaycanlı gənclərə güvənmək, onlara şans vermək lazımdı. "Şamaxı”nın rəhbərliyi də bu strategiyanı seçib, ona uğurla əməl edir. İlk dövrədə "Şamaxı” məğlubiyyətləri sıralayanda da onlar bu prinsiplərdən imtina etmədilər, seçdikləri xəttə sadiq qaldılar. Artıq nəticə göz önündədi. "Şamaxı” ikinci dövrədə yalnız "Qarabağ”a böyük hesabla uduzub ki, bu da başadüşüləndi. Heç "Neftçi” də "Qarabağ”ın qarşısında tab gətirə bilmir. Əvəzində "Turan Tovuz” səfərdə, "Sumqayıt” doğma meydanda məğlub edilib. Onlardan savayı "Şamaxı” "Qəbələ”yə, "Səbail”ə, "Sabah” və "Kəpəz”ə uduzmayıb. İkinci dövrədə keçirdiyi yeddi oyununun altısında uduzmayan komandaya böyük bir "əhsən” düşür.

Özü də bu "əhsən”də yerlilərə inanan klub rəhbərliyinin və heyətdən düzgün istifadə edən məşqçilər korpusunun da böyük payı var. Məşqçiləri bəziləri kimi "legionerimiz yoxdu”, "bu heyətlə heç nə etmək olmaz” deyib, bəhanələrin arxasına sığınmadılar. İndi də çəkdikləri əziyyətin bəhrəsini görürlər. Bununla da "Şamaxı” Azərbaycan futbolunda yaxşı bir ənənənin əsasını qoymuş oldu. Biz futbolumuzun gələcəyinin ayaq səslərini "Şamaxı”nın gənclərinin timsalında eşidirik. Yola davam, gənclər!